الفيسبوك تويتر انستقرام لينك دن يوتيوب قوقل بلس سناب شات    

قالت لي [ لك يومين تكبس بعيونك ] و ضاعت علومي ^_^

  • 10 مارس 2013
  • 3 تعليقات

ايوه وحدهـ قالت لي !!!! << مهو مستوعب 😀
تمهيد للسالفة
الي صار امممم , انا هالسنة في لجنة الاعلام الجديد و مسئول عن موقع معرض الرياض الدولي للكتاب و الحسابات الخاصه بالمعرض على ( تويتر ,فيس بوك , انستقرام , يوتيوب ) و معي قروب مكون من بعض المطانيخ او بمعنى [طيور شلوى] و طول يومي في المعرض من 10 الصباح الى 11 بالليل بين الصالات و حفلات التوقيع ( محسسيني انها حفله و هشك بشك ) و الاستراحه تكون بالمركز الاعلامي مع نخبة الاعلام السعودي ( متعوب على كلمة نخبه ) ما علينا من كل هالمدح و السوالف لكن وش سبب هالسالفة ؟؟؟؟

سبب السالفة  !!!
الي صار ان زوج امي الي هو ابوي شفاقة بن وتيد الحنتوشي العنزي يبي يسافر هالاسبوع لكم ديره حسب التسلسل ( جيزان ثم جده ثم اثيوبيا واحتمال يكمل الوجهه لـ اريتيرا ) و كلمني وانا بالمعرض يبي مجموعة من الكتب و خاصة بالمستشرقين و من ضمنهم الليدي آن بلنت و ربعها  من الي يلعبون بتاريخنا الي جالسين نشمي عليه و كتبهم تأكد المعلومات المغلوطه و حنا نتداولها  ,, مابي اطلع عن الموضوع وبقولكم بالضبط وش الي حصل ؟؟؟؟

وش الي حصل !!!
الي حصل وليته ما حصل , كنت ادور بعض دور النشر و مستعجل لان الكتب كثير بجمعها و احنا الساعه 10 و باقي اقل من ساعه على تقفيل المعرض و مركز على اللوحات حقت دور النشر و اتصلت على ابوي اقوله اسماء الكتب و مع اول دقه كانت بوسط الزحمه و حده تمشي و صار وجهي لوجهها و قالت لي انت لك يومين تكبس بعيونك وانا تعديتها بدون لا اهتم ولا التفت لان مخي كان مستهلك الكثير من الذاكره فيه وشغال من 9 الصباح بالاذاعة و بعدها بالمعرض طبعاً هي قالت هالكلام لاني عندي النظر صاير 4 من 6 , و اذا ابي اركز لازم اعطي زوم بعيوني , و دخلت مرحلة جديده هي عدم الاستيعاب و الفضول 🙁 !!!! والي زاد الطيب بله  ان بعد ما تعدتني البنت  شطفني و احد بالبداية كنت اضنه من الشباب صدقاي وقالي ( لا تحتك ) وهو معطيني ظهره وانا بدوري ما عندي حيله أني أعطيه زوم بعيوني  زياده ولا عرفته و راح للبنت , طبعاً نسيت ابوي و الاتصال و صارت حالتي حالة و صار عندي ارتداد عسكي على مخي بسبب الي صار !!!

وش الي صار بعدها ؟؟؟ ؟
بطلت سالفة اني اشتري كتب وذبحني الفضول و اللقافه من راعي كلمة لا تحتك  و من هالبنت الي تقولي  لك يومين تكبس بعيونك و اكتشفت انه كأنهم كأنهم كأنهم الوضع الي بينهم يسمونه مغازل بينهم والله اعلم 😀  . بعد ما شفتهم يمشون مع بعض و كأن فيهم شي عرفت ان العلاقه رومنسية و قامطين العافية بعدها توجهت لجناح وزارة الاعدام عفواً وزارة الاعلام و اول واحد اقابله هو ابو بسام مدير جناج الوزارة وأجلس اشكي له من النظر و اني تهزئه و هو يطقطق علي و اجلس اردد وانا طالع من المعرض
الحياة الكسيفة و العناء و الحسايف — خلت القلب يرجف غصب ما هو بكيفه
ألا و البنت وحبيبها الي قالي  ( لا تحتك ) طالعين و اشوفهم بس شكله خويريف لان شفته يشيل كراتين كتب و شكله يشتري و يعبي العربه لها و يطلع من جهه و هي من جهه و انا معي عبدالله العامر رافع ضغطي بالمعرض ^_^

نهايتها
عرفت اني ضايع و الله مضيعني , النظر عندي مش حالك و انا في عالم و الناس بعالم و البنت بصراحه احسها كشخه , لا ما احسها الا هي كشخه بصراحه , طبعاً ما ادري وين اختفت والله يستر عليها … وبناء عليه بخفف النظرات و امشي عدال الحيط على ما يقولونه اخواننا الي مدري منهم

شطحة بـ هاليوم 🙁
هاليوم السبت الموافق 27\4\1434هـ يعتبر اليوم اول يوم اتقدم فيه بإجازة من الدوام من 6 سنوات تقريباً و لا اعرف اكتب النموذج و مستثقله ^_^  ++ ما كل شي صار ينقال , و البنت حلوه 🙁

وانا سهران و بنام 🙂 Bay

فوبيا … بعد انفجار شاحنة الغاز بالرياض

  • 01 مارس 2013
  • 1 تعليق

تاريخ 16 ذو الحجة هو على ما يقولونه عمر جديد لي و من ايامة وانا أعاني من فوبيا من التجمعات بسبب أنفجار شاحنة الغاز بالرياض و لحظة خوف الى الان ما أقدر ابعد عنها , طبعاً كأني دجاجه بس على نفسي ^_^ , لان الي صار بالنسبة لي كل ما اذكر تفاصيله أتحمد الله ان لقافتي ذاك اليوم كانت مهي موجوده و مالي نفس انزل من السياره وكانت سبب بعد مشيئة الله بعمر جديد لي الى درجة ان في مكتبي الخاص  ( التجاري الغير حكومي ) بجواره مطعم أتوقع انفجار الاسطوانه بشكل دائم من ما أجبرني بتعديل أماكن المكاتب الداخلية ^_^ , يعني شبه مهلوس بشكل كبير

بداية السالفة
كنت يومها في استراحة خلف حي النظيم و افر بالشوارع من باب الفضاوه الزايده , والي حصل كان دخان اسفل كبري المعيزيلة و انا بعيد عنه مسافه و اقرب له بشكل بطيئ و كنت وقتها اكلم رامي التميمي اناقشه بمشروع تقني و اشاوره بالشعار و المشروع فيه محتوى غنائي ( كنسلته بشكل نهائي ) و من لقافتي قلت له اصبر بكتب تغريده عن الدخان الي تحت الكبري  وكان ودي انزل وكانت زحمة اسفل الكبري والشاحنات مقفله الطريق , لان اصحابها ينزلون و يهربون بكل اتجاهـ وانا على وجهي بنزل  بس منعني طريقة نزول اصحاب الشاحنات و قدامهم اصحاب سيارات ناشبه بين الحريق وبينهم , والي منعني بعد هو  من باب الحياء مابي اسحب على رامي وكنت بخربها لكن قلت خلني أكتب تغريده عن الحريق ( دخان ابيض وقتها ) ,و بعد ضغطي لزر نشر باقل من 20 ثانية تحول الدخان الابيض وما حوله الى كتله من النار ( مثل الي نشوفها بالافلام الامريكيه بأفلام أختفاء العالم حقتهم  ^_^ ) وكنت ماني مستوعب الي حصل و كتبت وراها تغريده انه تحول الى حريق لكن مع ضغطي لزر ارسال , انقطع الارسال و طاح الجوال من يدي و رجعت اتصل فيه و اضحك و اقوله انفجر شفته ( اسأله من الفهاوه ) وكنت اشوف اصحاب الشاحنات و السيارات يتركونها و يركضون بأتجاهـ أستاذ الملك فهد اقرب منطقة أمان , وانا من مكاني اردد المقوله ( الهروب ثلثين الشجاعه ) مع اني بكل حادث لازم اوقف مهما كان , بس يومها منظر الحريق من هوله خلاني ما ابعد عن البيت 3 ايام , و بعد مروري على مكان الانفجار شعوري شعور شخص له يد بالانفجار ,,,,,, كانت حصيلة الانفجار ضخمه وتقرر بعد اقل من أسبوع العمل على البدء بأزالة الكبري بسبب عدم صلاحيته للعمل , و بالنسبة لي اقول ازالته نعمه لأنهاء ذكرى مرعبه لمن كتب الله له عمر جديد

مكان وقوفي لحظة الانفجار

مكان وقوفي لحظة الانفجار

تخطيط جوي لموقع الانفجار و يبين أتجاهـ الهواء

تخطيط جوي لموقع الانفجار و يبين أتجاهـ الهواء

حينما يكون ( حاميها حراميها )

  • 19 يوليو 2008
  • 1 تعليق

( طبعاً العنوان شطحه على اهل اللغه هذا الي قلته اليوم بعد ما حنيت لسيارتي الله يذكرها بالخير ويرحم حالها ( نيسان التيما ) زرتها من طلعة وادي لبن ( مرتفع بجوار الحجز ) وهي داخل الحجز بسبب ان السيارهـ تم سرقتها من شباب الله يسامحهم ( لو اعرفهم اعطيهم الي يبون بس يسلمونيها ولا يسلمونها حماة الوطن )

طبعاً سالفة السيارهـ انها تم سرقتها من بعض عيال الحمايل  من اكثر من شهر ونص ومسكوها شرطة حي العليا وتم حجز السيارهـ بتشليح عفواً بحجز وادي لبن وحجز وادي لبن يوم استلمو  السيارهـ كانت تمشي وبعد اسبوع قصو رجلها اليسار ( فكور الكفر والقطع الي ماسكه الكفر ) وبعدها بكم يوم طار الصدام  وموضوع السيارهـ الي يقهر فيه ان الي سرقوها ركبو مع صديقهم والشرطه عندهم علم وكلمو صديق الي سرقو السيارهـ والى الان ما سوو له شي واتوقع ان عندهـ فيتامين ( و ) ومن النوع الطيب لان موضوع السيارهـ اعتبروهـ الشرطه قضية وكل قسم شرطة يرسله للقسم الثاني بحجزة ان مالنا دخل  متوقع ان الي سرقها صاحب سمو ولا من الهوامير بالسعوديه لان الي اشوفه ما صار جديد والي صاير تعقيد لي و السيارهـ بالتشليح قصدي بالحجز عند رجال الامن البواسل ( والله من عذر طاش ما طاش فيهم البلا عيوبهم ما تنرقع )

ويا شينها لو سرقوك العيون الناهبه عفواً العيون الساهرهـ