الفيسبوك تويتر انستقرام لينك دن يوتيوب قوقل بلس سناب شات    

أجتماع أخر الليل ثلاثي الابعاد ( والله من الدجه )

  • 22 مارس 2013
  • 9 تعليقات

هو كـ أي اجتماع يقام في العالم , لكن بالنسبة لي هي اجتماعات مع صديقي المهندس منصور , والاجتماعات هذي دايم تكون مثمره و بنسبة لي بتخطيطها و بالنهايه مع ظهور أول نتائجها اكون متفائل بالحيل ,
سبب التفائل .؟
السبب في التفائل هو لوجود هذا الشخص منصور ( له سالفه بذكرها بتغريده في المستقبل ) وهو صديق خاص بالنسبة لي في حقبه تاريخية ما ,

ليش متفائل فيه ؟؟؟
طبعاً عندما كان زميلي ( المذكور اسمه في الاعلى ) في أجتماعين سابقين مشابهه لهذا الاجتماع الحالي قبل سنوات , كان التفكير كيف نسوي مشاريع بدون تكلفة ماديه . وكان اول مشروع هو موقع أستضافة و برمجة مواقع و تم اطلاقه في عام 2004 بأسم ( المجرات ) بتكلفه هي الاعلى بالنسبة لنا وهي 64 ريال فقط … و الاجتماع الثاني هو انشاء موقع لنفس المدينة التي كنا نقطن فيها ( شرايكم بنقطن بس ^_^ ) الموقع اسمة ولا بلاش ما علينا . المهم كانت تكلفة الموقع 31 ريال وتقدم بعد اقل من سنه اشخاص يبون يشترونه بملبغ 60 الف و السبب الاكشن الموجود في تلك الايام الكأيبه و حقق نجاحات كبيره جداً و بالحيل واجد . وكان سبب لنجاحي في ثاني ثانوي بعد ما عدتها 4 مرات , و بعد الموقع ناجح بدون لا احضر ^_^
طيب ليش مجتمعين اليوم
امم السالفة و مافيها اننا في تطور تقني كبير جداً و الاذاعات الالكترونية غير موجوده ولا فيه اشخاص مستعدين لتشغيلها لمتطلبات عقلية تقنية ( شعنده يمدح نفسه ) طبعاً احنا في صدد أنشاء إذاعة اليكترونية تبث من خلال الانترنت و من خلال الاجهزة الذكية
و عندنا مشكلة الان بالاسم للإذاعة وش راح يكون ..

المطلوب : ( اتمنى مشاركتكم )
لنا كم ساعه مجتمعين على شان الاسم , كل شي تمام , البرمجة و الموقع و السيرفرات و أجهزة البث و التصريح الاعلامي و باقي الأسم , و المشكلة ان كل اسم اقوله يقول لا هذا كلاسيكي ( مدري من وين متعلم هالكلمة ) فا دبرونا … EnD

قالت لي [ لك يومين تكبس بعيونك ] و ضاعت علومي ^_^

  • 10 مارس 2013
  • 3 تعليقات

ايوه وحدهـ قالت لي !!!! << مهو مستوعب 😀
تمهيد للسالفة
الي صار امممم , انا هالسنة في لجنة الاعلام الجديد و مسئول عن موقع معرض الرياض الدولي للكتاب و الحسابات الخاصه بالمعرض على ( تويتر ,فيس بوك , انستقرام , يوتيوب ) و معي قروب مكون من بعض المطانيخ او بمعنى [طيور شلوى] و طول يومي في المعرض من 10 الصباح الى 11 بالليل بين الصالات و حفلات التوقيع ( محسسيني انها حفله و هشك بشك ) و الاستراحه تكون بالمركز الاعلامي مع نخبة الاعلام السعودي ( متعوب على كلمة نخبه ) ما علينا من كل هالمدح و السوالف لكن وش سبب هالسالفة ؟؟؟؟

سبب السالفة  !!!
الي صار ان زوج امي الي هو ابوي شفاقة بن وتيد الحنتوشي العنزي يبي يسافر هالاسبوع لكم ديره حسب التسلسل ( جيزان ثم جده ثم اثيوبيا واحتمال يكمل الوجهه لـ اريتيرا ) و كلمني وانا بالمعرض يبي مجموعة من الكتب و خاصة بالمستشرقين و من ضمنهم الليدي آن بلنت و ربعها  من الي يلعبون بتاريخنا الي جالسين نشمي عليه و كتبهم تأكد المعلومات المغلوطه و حنا نتداولها  ,, مابي اطلع عن الموضوع وبقولكم بالضبط وش الي حصل ؟؟؟؟

وش الي حصل !!!
الي حصل وليته ما حصل , كنت ادور بعض دور النشر و مستعجل لان الكتب كثير بجمعها و احنا الساعه 10 و باقي اقل من ساعه على تقفيل المعرض و مركز على اللوحات حقت دور النشر و اتصلت على ابوي اقوله اسماء الكتب و مع اول دقه كانت بوسط الزحمه و حده تمشي و صار وجهي لوجهها و قالت لي انت لك يومين تكبس بعيونك وانا تعديتها بدون لا اهتم ولا التفت لان مخي كان مستهلك الكثير من الذاكره فيه وشغال من 9 الصباح بالاذاعة و بعدها بالمعرض طبعاً هي قالت هالكلام لاني عندي النظر صاير 4 من 6 , و اذا ابي اركز لازم اعطي زوم بعيوني , و دخلت مرحلة جديده هي عدم الاستيعاب و الفضول 🙁 !!!! والي زاد الطيب بله  ان بعد ما تعدتني البنت  شطفني و احد بالبداية كنت اضنه من الشباب صدقاي وقالي ( لا تحتك ) وهو معطيني ظهره وانا بدوري ما عندي حيله أني أعطيه زوم بعيوني  زياده ولا عرفته و راح للبنت , طبعاً نسيت ابوي و الاتصال و صارت حالتي حالة و صار عندي ارتداد عسكي على مخي بسبب الي صار !!!

وش الي صار بعدها ؟؟؟ ؟
بطلت سالفة اني اشتري كتب وذبحني الفضول و اللقافه من راعي كلمة لا تحتك  و من هالبنت الي تقولي  لك يومين تكبس بعيونك و اكتشفت انه كأنهم كأنهم كأنهم الوضع الي بينهم يسمونه مغازل بينهم والله اعلم 😀  . بعد ما شفتهم يمشون مع بعض و كأن فيهم شي عرفت ان العلاقه رومنسية و قامطين العافية بعدها توجهت لجناح وزارة الاعدام عفواً وزارة الاعلام و اول واحد اقابله هو ابو بسام مدير جناج الوزارة وأجلس اشكي له من النظر و اني تهزئه و هو يطقطق علي و اجلس اردد وانا طالع من المعرض
الحياة الكسيفة و العناء و الحسايف — خلت القلب يرجف غصب ما هو بكيفه
ألا و البنت وحبيبها الي قالي  ( لا تحتك ) طالعين و اشوفهم بس شكله خويريف لان شفته يشيل كراتين كتب و شكله يشتري و يعبي العربه لها و يطلع من جهه و هي من جهه و انا معي عبدالله العامر رافع ضغطي بالمعرض ^_^

نهايتها
عرفت اني ضايع و الله مضيعني , النظر عندي مش حالك و انا في عالم و الناس بعالم و البنت بصراحه احسها كشخه , لا ما احسها الا هي كشخه بصراحه , طبعاً ما ادري وين اختفت والله يستر عليها … وبناء عليه بخفف النظرات و امشي عدال الحيط على ما يقولونه اخواننا الي مدري منهم

شطحة بـ هاليوم 🙁
هاليوم السبت الموافق 27\4\1434هـ يعتبر اليوم اول يوم اتقدم فيه بإجازة من الدوام من 6 سنوات تقريباً و لا اعرف اكتب النموذج و مستثقله ^_^  ++ ما كل شي صار ينقال , و البنت حلوه 🙁

وانا سهران و بنام 🙂 Bay

اختراق مخ [قوقي] من خلال الهندسة الاجتماعية

  • 05 سبتمبر 2010
  • 10 تعليقات

من كم يوم تم عملية اختراق لـ احد الملاقيف وهو عبدالرزاق ولد خالتي الملقب بـ [قوقي] وطريقة الاختراق تم من احد اقسام الهندسة العكسية , و بالتحديد من خلال الهندسة الاجتماعية , اكيد احد الي يقرون هذي التدوينة راح يقول وش عندهـ البدوي سوالفة واجد و يتفلسف , طبعاً الهندسة العكسية تدرس بطرق غير مباشرة في الادارة و التسويق و البرمجة و التطوير , وهي معرفة الاخطاء و الثغرات في الانظمة و استغلالها , وفي الكون اكثر ما يوجد هو الانظمة , مثل المخ و الكمبيوتر , و البرامج و المشاريع حتى معدة الانسان 😀 و كل شيء يبنى على اسس و معايير و الهندسة العكسية في الوقت الحالي صار متعارف عليها في مجال التقنية و امن المعلومات فقط , ولكن في مجالات كثيرة موجوده و انا في دراستي في مادة مبادئ الادارة ( وش عندي مسوي دارس دكتوراهـ ) كان فيه كلام كثير عن الهندسة العكسية لكن الله يهدية مؤلف الكتاب ما وضح الجزئية هذي لكن تفلسف فيها و اعطاها مسمى ثاني تقريباً هو مراقبة الاخطاء و الاستفادة منها وهو هذا هو المعنى الاساسي للهندسة العكسية , في هذا الموضوع عشان التركيز لازم الشخص يفهم وش هو الاساس و ايش هي الفروع فـ الاساس هو الهندسة العكسية
وفيه لها بـ عالم الهكر فروع كثير يستخدمونها الهكر في الاختراق من ابرزه
1- الهندسة الاجتماعية
هذا القسم يستخدمونه المبتدئين و المحترفين بالهكر لكن المبتدئين هم اكثر استخدام له وهو نفسة الي تم اختراق [قوقي] من خلاله