الصوت يكفيني عن الشوف ^_^

صناعة العدسات تُعتبر من أقوى الصناعات الدقيقة في العالم، وهي من أهم اختراعات البشرية.
وتُحسب (بعد فضل الله) للشيخ أدولف فيك، صاحب النظريات في علم الانتشار.
طبعًا أدولف من أشهر قبائل ألمانيا 😅، وعيال حارته كانوا يسمّونه “أبو شهاب” لأن شنباته ما كانت بعيدة عنه،
لكن الفرق إن أدولف فيك له صولات وجولات في العلم… وأبو شهاب طلع خَيْطي بَيْطي ومثل “حريماااته” (على قولهم 😁).

أدولف فيك هو السبب إني شفت العالم الخارجي خلال الشهر الماضي، وغيّر نظرياتي في الشارع السعودي… (نظريات مهو نظارات 😂).

البداية:

كانت البداية في فندق الفورسيزن، بعد ما شفت بالصدفة “البقرة” اللي قالت لي في معرض الكتاب:
“لك يومين تكبس بعيونك!”
شفتها وكنت طالع لاجتماع، وحسيت إني ضايع، وقلت: يا أسوي ليزك، يا أعتزل الأماكن العامة!
لأن الوضع صار خيطي بيطي… أعمى واسمي أشوف ^_^

ثاني يوم:

كنت في الملتقى السعودي الدولي للمنشآت الصغيرة والمتوسطة (اللي تسويه بعض الجهات الحكومية والخاصة عشان يبينون إنهم يدعمون مشاريع الشباب، وهي سوالف بس… وفلوس تنصرف من ميزانيات الوزارات 😅).

كنت إذا بتكلم مع أحد، لازم أكبس بعيوني عشان أشوف وجه اللي قدامي.
(التكبيس = رفع الخشم للأعلى وإنزال الجبهة للأسفل 🤓)،
وكانت حالتي كذا طول الوقت… لا تجرب تكبس!

في نهاية الملتقى، أخذني واحد من أصدقائي وأجبرني ألبس نظارات،
وتمّ هالشي بمساعدة الدكتور، وأنا والعدسات مطارح لأن العدسات ما كانت راضية تدخل من كبر عيوني ^_^
بس بعد ما لبستها… كانت المفاجأة 😲

وش هي المفاجأة؟

عرفت إني دخلت عالم ثاني!
شي جديد، إبداع في كل زاوية من الرياض!
لوحة “سنتربوينت” أول مرة تلفتني فكرتها!
لوحات طريق العليا؟ أول مرة أشوفها!
ذاك اليوم نمت الفجر بسبب الهوايل اللي شفتها 😅

وش اللي شفته؟

أول شي شفته في التحلية: السيارات ومناظر البشر اللي مدري شلون جايه أشكالهم،
وخاصة فئة الكدش (البنات المتوحشات 😁).

أهم جولة كانت في ممشى الروضة…
مجموعات شباب كأنهم طالعين من عرس، وبنات أردى منهم بكثير!
وأكثر شي صدمني: النقاب 😳
لأني كنت أعرفه ستر، وطلع فتنة!

النقاب (هو الغطاء اللي يبين عيون البنت)
ما كنت أتوقعه بهالشكل…
كنت أشوفه ستر، وطلع يعرض أحلى ما بالبنت: العيون والرموش!
وكنت “أدلّخ” وأنا أمشي، والسبب؟ العدسات 😅

ومن ذيك اللحظة تغيّرت نظرياتي، وتوجهاتي “الحنتوشية” الليبرالية…
(قلت ليبرالية عشان اللي يتهمني يصدق نفسه ^_^)

زبدة الكلام:

أنصحكم بالعدسات… تراها زينة! ^_^
وأشكر أدولف فيك 😄
وأهديه هالكلمات: الصوت يكفيني عن الشوف 🎵