عبيد وتحليل “وش السوات”

منذ مبطي، حول مدينة طبرجل، كان فيه رجالٍ اسمه عبيد. ( ما اقصد عبيد راعي سالفة “ماضنتي يا عبيد تاكل بطاطا”). عبيد راعي غنم، لكن عنده فكر استراتيجي وابتكارات وفلسفات إدارية، مثل “البعير والخيول” و”نظرية الرعيان الداجه”. وكان يُعتبر من سلالة أرستقراطية… لكن السلالة طاروا بـ”العَجَّه” واختفوا. (العَجَّه هنا معناها غبار قوي، مهو العجة اللي عند أبو جهل والزير). عبيد من الشخصيات اللي ما تعرف وش يعني “فشل”، وعنده فلسفة تجارية تخلي طحاطيح هارفرد يأذنون إنجليزي من كثر ما يبدع، ولو شافوه هناك كان لقبوهـ بلقب الـ “كارثة كروية”.

عبيد ما كان بس يدير العمليات التشغيلية للغنم (يعني: رُوَيّعي 😅)، لا … كان يخطط، يحلل، يراقب الاسواق و اسعار الاعلاف و الامطار وكان يضبط الاوقات متى يشتري ومتى يبيع. وكان إذا جلس مع البدو ، ويقولهم بلسان ( الفاهم ) : ترى التجارة ما هي خيطي بيطي، هذي لها سوات! واهم شي السوات طبعاً البدو استغربوا، وقالوا له: وش تقصد بالسوات؟ لأن كلمة السوات عندهم معناها الفعل أو التصرف، و عبيد يشرح لهم نظريته العظيمة.

كان يرسم أربع مربعات على التراب ( الرمل ) : اثنين فوق واثنين تحت. المربع اللي فوق يسار قال عنه: هذي العلوم الغانمة اللي عندي، مثل إن العلف متوفر، والحظاير دايم مليانة، وغنمي تعرف الطريق مع المرياع ( المرياع هو الخروف القيادي الي تتبعه الغنم) . والمربع اللي فوق يمين قال: هذا الزين عند الناس، مثل سوق الغنم النشيط، وكثرة المشترين من الكويت عشان الربيع. وتحت يسار قال: هذي الشين اللي عندي، مثل شريكي صمعي اللي ما يفرّق بين نعيمي وسواكني! أما تحت يمين فكان يقول: وهذي الشين اللي عند الناس، مثل غلاء العلف والتجار الجدد اللي جايين من القريات.

كان يتفلسف عليهم بالرسم ويشرحها كأنها خريطة طريق، وإذا سأله أحدهم: يا عبيد، وش تسمي هالرسم؟ كان يرد بثقة: أسميه السوات،.

ومرت السنين، و سوات عبيد ما مثلها سوات وفي يوم من الأيام، كان فيه خواجه ( انجليزي ) ضايع يدور الأهرامات ، ومر حول طبرجل وشاف عبيد جالس و ينادونه يا عبيد . الخواجه قرب لهم وسأله : أنت راعي البطاطا؟ فرد عبيد: لالوه، الخواجة لابس بدلة وكان باين عليه الخوف، جلس مع عبيد شوي، وبدأ يلاحظ إن البدو يجتمعون عليه يسمعون شخابيطه بالارض ويشوفون مربعاته . ومن الفضول، سأل الخواجة اللي اسمه Albert S. Humphrey وقال له بالإنجليزي: What is this strategy you’re doing on the sand؟ فرد عليه عبيد بكل بساطة: This? This is SWOT, ya habibi.

الخواجة رجع بلده، وكتب أطروحة إدارية سماها SWOT Analysis، والعالم و اشتهر منها و صار معروف فيها و عبيد معروف بالبطاطا 🙁 ، وما دروا إن الأساس جا من عبيد ، اللي رسم استراتيجياته على التراب

ملاحظة ختامية : هالسالفة من راسي… لأني أدرس هالوقت ماجستير في الادارة ، 😅